تحت هذا العنوان  كتب النائب ياسين العياري  متحدثا عن التصويت في مجلس نواب الشعب على اتفاقية أممية أمضت عليها تونس و تنتظر موافقة البرلمان لتدخل حيز التنفيذ .
وهي اتفاقية تمكن تونس من مبلغ 2000 مليار لصيانة الشواطئ والبيئة على طول الشريط الساحلي . وقد انتقد العياري  بسخرية الكثير من النواب  الذين تسببوا حسب رأيه في أن تخسر تونس 2000 مليار جرّاء " إيديولوجيا متخلّفة " وصراعات وتصفية حسابات ...
وقال ياسين العياري في هذا السياق :

" اليوم عندنا تصويت على القانون عدد 7 لسنة 2020.
إتفاقية أممية، صححت عليها تونس و تنتظر موافقة البرلمان لتدخل حيز التنفيذ.
الإتفاقية هذه تاخذ بمقتضاها تونس 2000 مليار، لصيانة الشطوط و البيئة على طول الشريط الساحلي.
فاقوا الزملاء، الّي الكيان الصهيوني عضو في الأمم المتحدة.
بعض الزملاء، الي في الحكومة الي مقدمة القانون، في شعبوية واضحة و مزايدة فارغة، إعتبروا إن الإتفاقية "تطبيع"  :)
المشكل وين؟ الصهاينة مصححين على الإتفاقية، بينا و الا بلاش!
كي طاحت الإتفاقية، أحنا خسرنا 2000 مليار! والصهاينة ؟ مستفيدين من كل نتائجها.
و الضحك وين، كان هذه إتفاقية أممية تطبيع، إمالة لازم ننسحبوا زادة من إتفاقية حقوق الطفل  :) لأنها من حيث الشكل القانوني = كيف كيف و الصهاينة مصححين عليها.
نواب النهضة، هاذوكم الي قالهم إسماعيل هنية ما تجرموش التطبيع  :)
نواب النهضة، هاذوكم الي طيحوا عمناول قانون تجريم التطبيع  :)
نواب النهضة، الي الدورة الي فاتت، صوتوا على كل الإتفاقيات الأممية  :)
اليوم، ضهرلهم العكس  :)
الحصيلة : تونس خسرت 2000 مليار.
شبعنا مزايدات و عنتريات بالقدس، من عند الناس الي عطلت أي حاجة عملية و حقيقية للقدس و باراشوكاتهم.. إما عن جهل بالموضوع (وضحه الوزير تماما، و على عكس العادة، مداخلات سليم العزابي و شكري بلحسن اليوم كانت مقنعة) أو عن لؤم.
هذا الكل علاش؟ نبزيات و ضربان حزام في وسط الإئتلاف الحاكم، تحضيرا لما بعد الكورونا.
في أمل و عمل نعتقد أن خلاص و مستقبل تونس هو أن تكون.. خضراء رقمية
خضراء خسرت منذ لحظات 2000 مليار لصيانة و حماية شطوطنا و ساحلنا، علاش؟ خاطر الإئتلاف الحاكم متفكك، و يال الفضيحة، كذبا بإسم القدس.
نفس التفكك الي طيحلنا إتفاقية السوق الإفريقية كان تتفكروها.
تو يسيبوا جماعتهم يغلطوا في العباد، ينشرون الجهل حول الإتفاقية، كان هذيكا تطبيع، لازم اليوم تونس تنسحب من عضوية مجلس الأمن، خاطر الصهاينة، فيه.. هذا منطق اليوم، منطق أعوج،أعرج، مبتذل، يتاجر بالقضية الفلسطينية باطلا و خسّرنا في 2000 مليار و حماية بيئتنا.
اليوم، يوم برلماني حزين! هاني معارضة و نصوت للقانون لأنه فيه مصلحة، و هانهم حكومة، يصوتوا ضد، بمزايادات سخيفة.
يلعبوا بتونس.. و ها أنتم تعلمون.
#خضراء_رقمية
#التطبيع_خيانة_عظمى
#فهموهم_التطبيع
#شعبوية
#عرك_ضراير
#ألفين_مليار
(إثر حملة سينيال مكثفة، مازلت ممنوعا من الفايسبوك حتى 11 جوان، النشريات تأتيكم عبر مشرف الصفحة.
إذا بعثتلي رسالة و ما جاوبتكش، راني فقط ما شفتهاش بسبب الحضر، الرجاء إستعمال حصرا الإمايل yassine.ayari@arp.tn )
Yassine Ayari