نشر الممثل والمخرج نصرالدين السهيلي ذكرياته مع المترشح للانتخابات الرئاسية قيس سعيّد. وقال السهيلي على صفحته الرسمية : قيس سعيد سلفي! مالا بابا إرهابي؟

"قابلت الراجل عشرات المرات بين 2012 و2018.. مانيش باش نحكي على المحاضرات و الندوات الي كان يعملها وحدو او مع التكفيري كمال الزغباني و يلقى فيها القصائد الشاعر الرجعي علالة الحواشي.. الخ

اما نتفكر حاجات أخرى بسيطة خارج نشاطو العلمي، حديثه مع الصغار على الطاهر الحداد و الدوعاجي و المالوف.. حديثه مع المراهقين و الشباب على الحياة الجنسية السليمة و أهمية مشاعر الحب، دخوله إلى بيوت الاهالي و فض عديد المشاكل الي صارت، مرة، اقسم بشرفي، خفت عليه و هو يحكي مع عزلكة ههه مشيت بحذاه ،نلقاه ينصح فيهم باش ما يحربشوش و يقلهم اعملو كعبات باردين مرة في الجمعة خير و حاولو ما تكثروش، السلفي الإرهابي!

جيت مرة انا و سهيل مشنشنينها قعد يعنق فينا و يضحك قال مطمان علينا خاطر لا عنا رخص قيادة لا كراهب.. ما ننساش مواسته لابتسام (16سنة) من ورشة الموسيقى الي ظهرلها من الناس الكل باش تحكي لقيس سعيد على محنتها في الحب و صاحبها الي فصع بيها و عدا معاها يجي ساعة، كان جات لي انا راني قلتلها امخط خشمك و روح.. الي خلاني نكتب ها الكلمتين موش رغبتي في انكم تنتخبوه، رغبتي في انا على الأقل ما نكذبوش عليه و ما نشوهوهش على الأقل.. دمتم"