متابعة لملف الاتهامات الخطيرة التي وجهها رئيس الجمهورية قيس لوزير المالية علي الكعلي بالهروب خارج حدود الوطن وتشبيهه بمصطفى خزندار الذي سرق " خزينة " الدولة التونسية ، كتب وزير الاتصال الرقمي وتكنولوجيات الاتصال الأسبق محمد نعمار الفهري التدوينة التالية على صفحته الرسمية اليوم الثلاثاء 3 أوت 2021 :

إلى السيد رئيس الجمهورية التونسية

آنا من الناس اللي ساندوك في إتخاذك للإجرائات الإستثنائية يوم 25 جويلية حتى في فهمك الموسع للفصل 80 من الدستور ، اللي آنا شاركت في كتابتو ،

و حتى تجميدك للمجلس ((اللي هو خارج الفصل 80) ما كانتش سابقة لأنو في 6 أوت 2013 رئيس البرلمان آنذاك، سي مصطفى بن جعفر، عمل نفس الشيء، لمواجهة خطر داهم اللي هو غليان الشعب وقتها على المجلس

و نحب نذكر ك اللي في 2012, دافعت على المقترح متاعك باش نعملو هيئة دستورية للتربية و التعليم ، باش نبعدو صغارنا على التجاذبات الحزبية

لكن ما نتفقش معاك في كل شيء

أعتبر كونو من حقك تحط و تنحي الوزير اللي يساعدك خلال الثلاثين يوم

لكن موش من حقك و موش من من مقام رئاسة الجمهورية التونسية باش تهتك أعراض الناس من غير ما تثبت من المعلومة قبل و خاصة كيف تقارن ناس نزهاء و شرفاء و يخدمو في البلاد من منطلق وطني، تقارنهم بسراق تونس في القرن 19، هذا يضر بمصداقيتك ، و ما يخدمش مصلحت الدولة

هاذي وجهة نظر ، إنطلاقا من معرفتي الشخصية بسي علي الكعلي منذ 10 سنوات

و لعلمك : إذا فما تنصت في تونس، راهو موش في وزارة التكنولوجيا ،

و لكم سديد النظر ، خلال ما تبقى من الثلاثين يوم

إلى هنا انتهت تدوينة الفهري ، مع التذكير بأن رئيس الجمهورية قيس سعيد صرح أمس الإثنين  أن وزير المالية المعفى من منصبه علي الكعلي متوار عن الأنظار وهاتفه مغلق، مشيرا إلى أنه "تم الاتصال به في عدة مناسبات ولم يحضر".

وخلال لقائه سهام البوغديري نمصية المكلفة بتسيير شؤون وزارة الاقتصاد والمالية ودعم الاستثمار في تونس، قال سعيد: كما سرق (مصطفى) خزندار الخزينة وهرب.. لا أعلم إذا الوزير (الكعلي) سرق أم لا"، مشيرا إلى أنه "لا أثر له".