أوردت منظمة أنا يقظ  اليوم 29 أفريل  منشورا على صفحتها الرسمية  أكدت فيه  أنها اكتشفت شبهة جديدة للمحسوبية في عملية التلقيح تتعلق بتلقي النائبة عن حركة النهضة أروى بن عباس  وهي أيضا عضو في اللجنة البرلمانية المكلفة بالإصلاح الإداري والحوكمة الرشيدة ومكافحة الفساد جرعة من تلقيح كورونا عن طريق ''صديقتها '' المديرة الجهوية للصحة بمنوبة نبيلة قدور  التي تمت إقالتها مؤخرا.

وجاء في نص المنشور ما يلي :  

'' غريبتنا اليوم في علاقة بالتلقيح وبالطبيعة مالإنتهازية والمحسوبية موش خارجين، ونائبة الشعب عن كتلة حركة النهضة السيّدة أروى بن عباس هي بطلة القصة. 
تحبوا تعرفوا كيفاش السيّدة النائبة تلقات الجرعة الأولى من التلقيح بالرغم إلي لاهي طبيبة ولاهي من ذوي الأولويات ولا تم استدعاءها ولا بعثلها حد SMS باش تلقح؟ 
كان تتفكروا من مدة تمت إقالة المديرة الجهوية للصحة بمنوبة الدكتورة نبيلة قدور، خاطر مكنت جملة من الأشخاص من الانتفاع بالتلقيح من غير ما توصللهم إرساليات قصيرة، إلي هو شرط باش أي مواطن ينجم يمشي ياخو جرعة و أذاكا علاش مصالح التفقدية بوزارة الصحة  فتحت بحث إداري في المسألة.
وبعد الإقالة صارت وقفة احتجاجية تطالب بإرجاعها و هذايا بالطبيعة على خاطر الدكتورة تنتمي لعائلة نقابية عريقة. 
لكن الخطير أنو خلافا لما يروّج، المديرة الجهوية ماسمحتش فقط لأعوان الإطار الطبي من التلقيح دون احترام الأولوية و الإجراءات و إنما مكنت صديقتها النائبة أروى بن عباس من تلقي الجرعة الأولى من غير ما تتم دعوتها عن طريق منظومة evax التابعة لوزارة الصحة.
ولكن لسوء حظ السيّدة النائبة تمت إقالت صديقتها من الإدارة الجهوية للصحة ومالقاتش رغم المحاولات اشكون يتوسطلها باش تكمل تاخو الجرعة الثانية من التلقيح. 
الغريبة زادة إنو السيدة النائبة عضو في اللجنة البرلمانية المكلفة بالاصلاح الإداري والحوكمة الرشيدة ومكافحة الفساد... 
هذي غريبتنا اليوم، نائبة شعب ما تحترمش القانون والإجراءات وتتصرف بأنانيّة باش تتلقى جرعة من تلقيح في بلاصة مواطن/ة عندو/ها الأولويّة، وما كفاهاش هذا مازالت تحاول تلقى طريقة باش تاخو دوزة الثانية خاطرها قعدت لا حشمة لا "جرعة".''