لاتزال تداعيات وفاة الطالب بالمبيت الجامعي برقادة من ولاية القيروان تثير الجدل و الاحتقان في صفوف الطلبة.وكذلك تثير الرعب بسبب ما كشفته الطبيبة التي التي استقبلت حالة عزيز في الاستعجالي.حيث أكدت أنه لم يتوفّ بسكتة قلبية و انما بسبب جرثومة نادرة.

وكتبت الطبيبة:

باللي شديت روحي مانجّمتش،

أما المنشور هاذا تبرئة ذمّة قدام العباد،

ربّي ووالديه مبرّئ ذمتي قدامهم، ومايستحقّوش منّي منشور.

عزيز المعراجي الله يرحمو توفّى عندي، في وقت خدمتي..

عزيز جابوه أصحابو في حالة هوما موش فاهمينها، سكر طايح وأوكسيجين طايح وهايج، سخانة تقلي فيه ووجايع في راسو وردّان وجريان جوف..

كيفاه باش تنجّم تفهم شعندو..

ماللول، قرينا في المدسين تركّح مريضك وباعد تفهم شعندو.. صلّحنالو السكر، طيّحنا السخانة، حطيناه بالأكسيجان، وعاودنا سألنا صحابو اللي جاو معاه شنية الحكاية.. الحكاية بدات بوجايع في راسو وسخانة، وباعد ظهرو الأعراض لوخرين.. هدانا ربّي وخممنا في الـMéningite، بين برشا تشخيصات أوخرين كانو ينجمو يكونو عندو..

الـMéningite هاذي مرض نادر، التأكد منّو يلزمك تعمل تحليل يتجبد من ماء الظهر، وفي الحالة متاع خليل يلزمو يعمل سكانار على راسو قبل.. للأسف عزيز كان عندو عدد الصفائح طايح في دمو، الشي اللي يمنع أنّك تعمل تحليل ماء الظهر.

أما قرينا زادا اللي الـMéningite est une urgence thérapeutique non diagnostique..

عزيز خذا الـAntibiotique اللازم بعد 49 دقيقة فقط من دخولو للإنعاش.. في الـ49 دقيقة أذوكم تحط تحت البنج والتنفس الاصطناعي.. في الـ49 دقيقة أذوكم حطينالو Voie centrale باش الدوايات تتعدا أسرع.. في الـ49 دقيقة أذوكم كانت عندي 3 حالات حرجة أوخرين يتطلبو الإنعاش وحياتهم واقفة عليا.. في الـ49 دقيق أذوكم باختصار كنت نخدم في استعجالي، للعباد اللي تعرف شمعناها استعجالي..

عزيز، الله يرحمو بدنو ما استجابش للدوا وتوفّى، ظهر في تقرير الطبيب الشرعي اللي عندو Méningite..

ماقصّرناش معاه، غطسنا فيه بعرقنا ودموعنا ومنغير ماناخذو حتى احتياطات رغم اللي نعرفو اللي المرض اللي شاكين فيه معدي، ماناش عاملين مزية أما برشا كلام يوجع قاعد يدور، وكان لازم التوضيح..

الله يرحمو، وربي يصبّر بوه، أنا اللي جبتلك خبرو ونعرف اللي موش باش تنسا وجهو ولا وجهي حياتك الكل..

فقط، العباد اللي خالطتو الأيامات لخرة يلزم تلقيح معين، باش تتكفل بيه الادارة الجهوية للصحة، تنجمو تسألوهم ولا تسألو في استعجالي ابن الجزار، وربي يحفظ الجميع..