علق الموسيقي التونسي المقيم بفرنسا محمد لاسود على ما شاهدناه من محتوى قدمه الفاضل الجزيري في عرض "محفل "في افتتاح الدورة 57 لمهرجان قرطاج الدولي لسنة 2023 حيث كتب على صفحته الرسمية التدوينة التالية :

"الدنيا كلات بعضها على عرض الافتتاح .... أنا ماحبيتش نعلق خاطر زايد .....أنا نقول لاصدقائي الفنانين والموسيقيين وكل من تاسف على اهمية الحدث اللي تونس الكل تستني فيه وطاح في الماء ...... (بعرض ينجم يتعمل بالتاليفون من غير بروفة اصلا ومن غير ما يتقابلوا الموسيقيين ..... يتقابلوا نهار العرض .... .ههههه) سي الفاضل الجزيري راهو خلص وخذا فليساتو كاملة على داير مليم .... راهو تو في الطريق لجربة ماشي باش يبدا العطلة الصيفية متاعو .... وحاطط المكيف في 17 والكرهبة باردة قلاس.... وأهم حاجة يضحك علينا الكل ههههههه وراهو يقول ملا عباد لا يفهموا في الفن ولا في العروض الكبيرة ........ أنا بتجربتي وباللي شفتو في تونس نقول سي الفاضل أنت اللي باش يذكرك التاريخ ... وانت اللي باش يتعمل مسرح وشارع ..... باسمك خاطر تونس ديما هكاكا .... وباش يرجع سي الفاضل في افتتاح قرطاج 2030 بالمحفل 2 أما بكاشي الدوبل متع اللي خدم بيه العام هذا ....

باش تنجح في تونس يلزمك تكون كي سي الفاضل ....تعرف تتصرف وتعرف منين تنظم امورك .... هذاكا علاش نقول للفنانين الشباب اخرجوا .......خمموا بلحق في رواحكم خمموا باش تكبروا وتعملوا حاجة اللي تخللي اسمكم عالي لفوق ... ما تخمموش في 50 خدمة في الصيف وعرابن وحاجات ساهلة...... ممكن فيها فلوس لكن تقتلك كفنان ... وتقتللك طموحك .... خمم اللي أنت باش تعيش مرة وحدة ..... وكيما قالت علية "فاما حياة واما فلا" ......وكان تحب تعيش كي "سي الفاضل " هذيكا تبقى قناعات شخصية ......

ملاحظة : مازالو برشة عروض باش تشوفوهم على طريقة "سي الفاضل". "