قدم الدكتور ماهر العباسي بعض المقترحات العملية لمقاومة انتشار فيروس كورونا ومعالجة المصابين وإنقاذ أرواحهم وفق التوصيات التالية :
مقترح غبي : كيفاه نضمن أنو أي مريض بالكورونا في أي بقعة من تراب الجمهورية ملي يتقلق يعدي عليه طبيب وياخو الأكسيجان في أقل من نصف ساعة .
بما أنو اللجنة العلمية لاهية تعمل في البراعة اليدوية وتلون في خريطة العالم أخضر أحمر قزوردي ....  مقترح مبسط لمجابهة الكورونا حسب إمكانياتنا :
تفسير : مالأسباب إلي الكورونا تقتل الناس الكبار والي عندهم إنسداد في الشرايين والدم والسكّر ، بخلاف التأثير المباشر متاع الكورونا على الجسم ، فمة التأثير الغير مباشر متاع الكورونا عن طريق نقص الأكسجان في الدم . نقص الأكسيجان في الدم لفترات ينجم يعمل حتى تأثير على شباب في صحة جيدة ولكن يعمل مضاعفات خطيرة على كبار السن والمرضى ومن أهم المضاعفات الجلطات في القلب والدماغ إلي تؤدي لتعكر الحالة و للوفاة . ولهذا من أهمّ وأنجع وسائل تفادي تعكّر حالة المرضى  هي أننا نفيقو بسرعة بنقص الأكسيجان في الدم ونعطيوه أكسيجان في خشمو  بصفة مبكرة لتفادي تعكر حالتو .
باش نطبقو الشيء هذا يلزمنا أربعة عناصر :
* ماكينة تقيس الأكسيجان في الدم
* مصدر أكسيجان
* طبيب يقيس الأكسيجان ويعدي عالمريض ويقول هذا يستحق الأكسيجان
* ممرض يركب الأكسيجان للمريض
وأهم حاجة في هذومة الكلّ هي الوقت  وأهم عنصر في تقييم الوضع هو نسبة الأكسيجان في الدم الي نقيسوه بماكينة صغيرة تدخل في الصبع : saturomètre .
===> باهي نشوفو شنوة عنا أحنا اليوم في إستراتيجة الدولة :
مريض كوفيد يتقلق يطلب 190 بعد عشرة سوايع يهزو عليه يقولولو قيس السخانة ولاباس علما وأنو هو وقتها ينجم يكون عندو 92%  أكسيجان في الدم  وقاعد يعمل في الجلطة .... بعد نهار يولي يغفق مالكوفيد وخاصة مالجلطة  يكلم ال190 يجيو يهزوه بعد أربعة سوايع ويقعدو يلوجولو على بلاصة وبعد يموت قدام السبيطار ونطلقو نداء إستغاثة .
===> المقترح
* ناخذو 1000 طبيب عايلة في القطاع الخاص نشريولهم 1000 saturometres  يتكلفو 50 مليون ونشريولهم  وسائل حماية بالعدد الكافي ونقولو للمواطنين إلي يتقلق يطلب طبيب العايلة متاعو والا الطبيب فلان الفلتاني الي داخل معانا في الإستراتيجية .... دونك في عشرة دقائق ملي يتقلق المريض يكون بحذاه طبيب يعدي عليه ويقيسلو الأكسيجان في الدم ويفهم درجة خطورة المريض .
* نجيو في كل مستوصف والا في كل  بناية في هالبلاد فيها حاجة تابعة لوزارة الصحة نركبو مصادر متاع أكسيجان الي إنجمو نطلبو مالقطاع الخاص يعاونونا علما وأنو أغلبهم فيهم البنية التحتية دونك فقط أشغال متاع زيادة ....  ما حاجتيش بالفرش أتو نرقدو على جراية أعطيني المريض ياخو الأكسيجان ..... دونك يولي أنا عندي في كل معتمدية مالجمهورية إنجم نتكفل بخمسين مريض نعطيهم الأكسيجان ونركز شوك روم في كل معتمدية مالموظفين متاع المعتمدية تنسق بين الأماكن المهيأة بالأكسسجان والطبة الي متعاقدين معانا وقتها نأكدلكم أنو ملي يتقلق المريض بعد عشرة دقائق يكون بحذاه طبيبو بعد خمسة دقائق يطلب الشوك روم متاع المعتمدية بعد عشرة دقائق يكون ياخو في الأكسيجان. قداه هذومة ؟ 25 دقيقة ... أهوكة خمسة دقائق كادو من عندي
والسلام